FHS Yrkisnám í Suðuroy

Landsstýriskvinnan í mentamálum, Rigmor Dam, hevur tikið avgerð um, at FHS Yrkisnám skal verða eitt av útbúgvingartilboðunum til suðuroyingar komandi skúlaár.

FHS er støðisútbúgving í fyrisiting, handli og skrivstovu, sum tekur eitt ár. FHS er sett saman av yrkislærugreinum og almennum lærugreinum. Flest allar lærugreinirnar enda við C stigi.

Eftir staðið FHS kann farast undir yrkisútbúgving innan skrivstovu ella handil.

Við rættari samanseting av yrkislærugreinum í FHS Yrkisnámi er eisini møguleiki at fara inn á annað árið á búskaparbreytini, sum eftir tveimum árum kann geva eitt gymnasialt miðnámsprógv.

Útbúgvingin verður skipað sum dagundirvísing. Tað verður Miðnámsskúlin í Suðuroy, sum skal standa fyri hesum tilboði, sum er ætlað fólki í øllum aldri.

Enn er ikki ásett, hvussu nógv verða tikin inn. Tað veldst um pláss.

Vit vita heldur ikki við vissu, um ein Búskaparbreyt verður sett á stovn, sum framhald av FHS.

Um so verður, ber til at lesa tvey ár afturat og taka prógv sum handilsstudentur.

Annars ber eisini til at halda fram í Havn ella í Kambsdali.

Treytin fyri at sleppa inn á Búskaparbreytina í Suðuroy og í Kambsdali er, at næmingarnir velja støddfrøði C og itrótt og heilsu á umsóknarblaðnum. Í Havn krevst støddfrøði C.

Upptøka á FHS er treytað av, at umsøkjarin:

1) Hevur lokið kravdu próvtøkur fólkaskúlans í 9. flokki í skrivligum føroyskum, donskum, enskum og støddfrøði, og

2) hevur lokið munnligu próvtøkur fólkaskúlans í 9. flokki, sum Mentamálaráðið hevur tikið út.

Umsøkjarar, sum ikki lúka hesi krøv, kunna tó verða tiknir inn eftir meting skúlans.

Kunngerð um FHS : www.logir.fo/Kunngerd/110-fra-07-10-2015-um-stodisutbugving-innan-fyrisitingarokid-handilsokid-og-skrivstovuokid

Vegna Miðnámsskúlan í Suðuroy. Ole V. Laursen